وقفة 25 يناير

شفت اللى حصل فى تونس من أيام ؟ ياه ، آخر دولة كان متوقع منها ده ، مستواهم المادى و التعليمى و الاجتماعى أفضل مننا ، و قبضة النظام على الصحافة و المعارضة و الشعب كانت أقوى مننا ، و مع ذلك نجحوا و فرضوا إرادتهم .

 صدقنى حتسمع تحليلات كتير حولين الأسباب و الدوافع فى تونس و يطلع لك المحللين فى الفضائيات يقرفونا و أهو بالمرة يُرزقوا و خللى الكل يكسب قرشين برضو م الحادثة .

أنا بأى حقول لك بالمختصر المفيد ليه ده حصل فى تونس و ما حصلش فى مصر .

من الآخر و بدون أى تزويق ، لأن مصر مافيهاش رجالة .

إوعى تزعل من الكلمة أو تاخدك الحماسة و الشعارات اللى الدولة زرعتها فى عدم المؤاخذة فى اللفظ دماغك ! لأن دى الحقيقة المرة اللى الحكومات الصهيونية اللى حكمت مصر عرفت تنشرها ، و مع الوقت تخللى رجالة مصر زى النسوان و أقل كمان بس طبعا بدون ما تقول لهم كده ، أصل أهم حاجة إن الواحد ما يشوفش العيب فى نفسه عشان يفضل مبسوط بحاله .

يعنى تخيل إن فيه واحد متجوز واحدة حلوة أوى ، الكل طمعان فيه ، بدأ الرجالة اللى حوليه اللى ما عندهمش شرف ولا دين يضحكوا عليه و بدأوا يحطوا له فى الأكل ادوية بتجيب عجز جنسى و يملوا حياته و عقله بكل حاجة بعيدة عن الشرف ، لحد ما بأى مع مراته زى قلّته ، و مش بس كده ، دول بدأوا يتقربوا من مراته اللى رفضت إنها تديهم حاجة ، لكن كان خلاص الراجل جوزها ما بقاش راجل ، و لما جه الكلاب و نهشوا لحم مراته وقف يتفرج ، ده حتى ما اتنرفزش ، أصلهم كانوا شالوا من جواه خلاص الرجولة و خللوه مبسوط بعجزه !

أهو المصريين بقوا كده ، بلدهم كانت حلوة فى يوم من الايام و ملكهم ، لكن الصهاينة شالوا منهم الرجولة و عوّدوهم بالتدريج على إنهم يتركبوا و يقبلوا ، و يشوفوا بلدهم الحلوة بتتسرق و تتنهب و تُغتصب ، لكنهم قابلين و ساكتين ، و الكلاب بيستمتعوا بيها بالحرام ، لكن للأسف الرجالة مش موجودة عشان تدافع عنها .

لعب الصهاينة على ألف وتر و كل الاوتار بتودّى فى سكة الخضوع و السكون ، قالوا لشوية رجالة منهم ، ايه رأيكم تبقوا شواذ ؟ أصل الرجولة دى حاجة وحشة أوى ، جربوا و حتشوفوا !!

و قالوا للتانيين انتو رجالة و عندكم اخلاق و زى الفل بس يا عينى أصل ده مش وقت تمكين ، خلليكوا شوية كده كمان تنضربوا بالجزم و تتهانوا ، و من وقت التانى حنقتل كام واحد منكم متعذبين ، عشان واحدة واحدة نزرع الرعب و الخوف جوّاكوا ، بس ما تقلقوش ، انتو على خير ، أهم شىء تفضلوا كده ساكتين .

و قالوا للى بعدهم ، انتو بأى حتصاحبونا و حتبيعوا شرفكم بمزاجكم ، حنيدكم فلوس و مش بس كده حندّيكم حاجة أهم و أجمل ، انتو ناس واطية و أكتر حاجة بتمتعكم السُلطة ، حنديكم كمان شوية سلطة عشان تفتروا بيها على الناس حوليكم ، و تطلعوا أزماتكم النفسية فيهم .

و انتو بأى الناس المبدعة فى البلد دى ، انتو العقول و الأجسام الفنية اللوزعية ، احنا طالبين منكم تطلعوا الفن و تقلعوا هدومكم تشبعوا شهوات الشعب ، و دى مش دعارة ولا حاجة ، ده هدف أسمى من عقول الناس البهايم اللى مش قادرين يفهموا ، و فى المقابل حنقرّبكم و حنخلليكوا انتو النجوم اللى بتهدى المخنثين للطريق و ما تقلقوش حنساعدكم بكل وسيلة عشان تفضلوا انتو القدوة و ما تقلقوش من الرجالة ، أصلهم خلاص ماتوا من زمان !!

و قعد الصهاينة يلعبوا على كل وتر و على كل حزب ، لكن كان هدفهم واحد ينشروا الدياثة و الخضوع بين الرجالة ، و لو فيه واحد قاوم كل ده ، ييجى وقت القتل و التعذيب .

تفتكروا رجالة مصر ممكن يرجعوا رجالة تانى و يدافعوا عن بلدهم و يرجعوا حقوق الناس المنهوبة زى ما عمل رجالة تونس ؟

و بقول لك ايه ؟ لو انت من الناس اللى بتقول أصل مافيش فايدة فى أى حاجة و انتفاضة ايه و مظاهرات ايه ؟ و احنا خلاص مستنيين الفرج من عند ربنا بمعجزة و الكلام ده ، يبقى اقفل الصفحة دى لأنك بتقرا فى المكان الغلط !! كده كده حتتخنق من الكلام اللى أنا بقوله .

لكن لو كان لسه عندك غيرة و زعلان إن بلدك بعد ما كانت أم الدنيا بقت ….. أم الدنيا ، و لو كنت لسه شايف إننا شباب مصر قادرين نغير و ننضّف بلدنا من الوساخة ، و لو كنت شايف إنك راجل بجد و مش عاجز ، شاركنا فى أول خطوة ، فى انتفاضة المعارضة يوم 25 يناير القادم .

أنا رايح قصاد الداخلية فى القاهرة ، حصرخ ضد الظلم ، حهتف بحياة مصر و رجالة مصر و رجالة تونس و أى رجالة لسه عندهم دم ، حهتف ضد الظلم يمكن اللى خايف يتشجع و ييجى يقف معايا .

اللى فوق ع الكراسى شايفيننا قليلين و عارفين إنهم سيطروا خلاص ع الناس ، بس احنا يوم 25 يناير عايزين نوريهم إننا كتير أوى و حنفضل نزيد لحد ما نبقى النار اللى حتحرقهم و بعد كده تنور مشاعل طريق النهضة لمصر .

يا ترى حتيجى معانا ولا لأ ؟ معادنا يوم 25 يناير .