25 يناير - بداية النهاية

اليوم الأول

امبارح كانت البداية ، 25 يناير 2011 ، اليوم اللى نزل فيه شباب مصر متوحدين ايدهم فى ايد بعض واقفين ضد الظالم .

أنا رحت لشبرا من بدرى ، و أول ما طلعت من محطة المترو ، لقيت ميدان شبرا كله إسْوٍد ، عربيات الأمن المركزى و العساكر واقفين إرهاب ! رحت لقهوة جنب الميدان و قعدت مستنى المعاد الساعة 2 الظهر .

و أنا قاعد كان فيه شباب كتير جنبى و كل واحد منهم بيبص فى ساعته و بيجيله تليفونات يسأل عن أخبار ، فرحت لأنى عرفت إنهم جايين معايا ، و مع الوقت بدأت الأعداد تزيد .

الساعة 2 اتجمعنا فى مجموعات كتيرة ظهرت و اتكونت فجأة بنظام و تحضر ، لكن كعادة الامن الجبان بدأوا تطويقنا و القبض على ناس مننا و ارهابنا ، جرينا منهم و بقينا نكون نفسنا مرة ورا التانية و هم يحاولوا يطوقونا ، و على الرغم إننا كنا نقدر نشتبك معاهم بسهولة إلا إن كل واحد منا كان ملتزم بإن التظاهر يكون سلمى ، حتى لما واحد كانت تاخد الحماسة و يكون عايز يشتبك مع الأمن كان اللى حوليه بيمنعوه ، و مع الأسف فضل الضغط يزيد علينا و يضيقوا علينا الخناق ، لكن الحمد لله المسيرة فضلت تتحرك رغم أى شىء .

ردود أفعال الناس اللى حولينا كانت متباينة ، يعنى فيه ناس انضموا لنا و هتفوا معانا ضد الظلم ، و فيه ناس كان رد فعلهم الطبيعى إنهم يطلعوا الموبايل و يقفوا يصوّروا و كأنهم فى جنينة الحيوانات ، و فيه ناس كانوا واخدين الموضوع ضحك و هزار و قاعدين يطلعوا نكت علينا و على الهتافات و كأن هم فى وادى و احنا فى وادى .

كان فيه بنات جدعان أوى معانا . صحيح أنا ضد اشتراك البنات حفاظا عليهم من الأذى بس بأمانة كانوا أرجل من 1000 راجل .

كنت حتمسك فى شبرا لكن ربنا ستر ، عافرت مع اللى ماسكنى و جريت لشارع جانبى و منه للمترو تانى عشان أروح لقلب المظاهرات فى التحرير .

لما رحت هناك كان فيه آلاف ، انضميت لهم أنا و غيرى و كان حوليا شباب كتير متصابين و دماغهم بتنزف !! ده كان الساعة 5 مساءا . كان وقتها الامن قفل جميع الطرق حولين التحرير بكردونات و سمح فقط للمشاة إنهم يتحركوا .

صليت المغرب فى المسجد و اتحركت عشان أشارك فى الوقفة ، و بجد كانت وقفة متحضرة بكل ما تحمل الكلمة من معانى ، و حزنت أوى لما شفت فى أخبار الجرايد القومية النهاردة الكلام عن التكسير أو التخريب رغم إن أى حاجة زى دى منهم و احنا ما لمسناش أى شىء .

مش بس كده ، احنا كان معانا بنات كتير من الطبقة المثقفة أو الجامعات الأجنبية ، و انتو عارفين إن الطبقة دى لبسها بيكون متحرر حبتين ، و على الرغم من كده ، و على الرغم من إنهم كانوا وسط آلاف الرجالة ، إلا إن مافيش حالة تحرش واحدة حصلت و لا حالة معاكسة واحدة حصلت ، كلنا كنا خايفين على بعض و كنا محافظين على بعض ، الأزمة دى ورتنا إن لما الشباب يبقى قدامهم هدف و يحسوا بقيمتهم ، حتطلع منهم أى قذارة فكرية أو جسدية ، و التدين الحقيقى بجوهره حيبان فى المصرى .

ظهر مع الوقت مجموعة من رموز المجتمع المختلفة ، كان منهم أيمن نور و جميلة اسماعيل ، و حتى ممثلين زى عمرو واكد ، و غيرهم و غيرهم ، و بدأ الناس تتجمع أكتر و تزيد .

قبل العشا بشوية ضرب الأمن مجموعة من القنابل المسيلة للدموع لكن الحمد لله عدّت بسلام و فضلنا واقفين فى أماكننا و بنزيد .

صلينا العشا جماعة فى الميدان ، دعينا ع الظالم و دعينا للشعب ، و رجعنا بعد الصلاة نقف مع بعض ، كان فينا كل الأشكال و الالوان ، السنى و الصوفى و الإخوان و العلمانى و الماركسى و غيره و غيره ، كل الناس كانت موجودة ، لكن بنسب متفاوتة ، لكن عارفين أكتر فئة كانت موجودة كانت مين ؟؟ كانت الفئة اللى دايما بتسمع كلام يسمّ البدن من الأجيال الفاشلة اللى سبقتها ، كانت الفئة بتاعت الشباب اللى بيقولوا عليه صيص ، بتوع الكمبيوتر و القهاوى ، بتوع الفشل ! تخيلوا ، هم دول أغلب اللى طلعوا يقولوا لأ للظلم .

و بالرغم إنى زى ما قلت شفت كل الطوائف و فرحت أوى بتواجد الكل ، إنما زعلت من العدد القليل من التيارات اللى كان لازم يكون ليها تواجد أقوى من كده ، واللى كنت متعشم فيهم أوى ، زى التيار السنى ، ليه المشايخ الكبار ما انضموش للناس ، دول لو حركوا الملتزمين كانوا نزلوا فى الشارع بالملايين ، لكن مع الأسف !!

فين باقى الناس ؟ معقولة تكون القاهرة أكتر من 20 مليون انسان و نبقى بس فى الوقفة 50 ألف ؟؟ كنت أتمنى ناس أكتر تنضم لنا ، و أنا واثق إن ده حيحصل النهاردة و بكره و ان شاء الله حنزيد أكتر و أكتر .

بدأ الوقت يمشى و الليل كانت سقعته بتزيد ، و الأمن يزود قبضته علينا ، لكن مافيش حد منا فكر يمشى ، قلنا حنبات فى الشارع و حنعتصم لحد ما مطالبنا تتحقق .

فى الوقت ده كان فيه بياعين بدأوا يبيعوا لنا الأكل و الشرب ، صحيح كان فيه واحد أو اتنين مغليين التمن ، لكن بعد شوية فوجئت إنهم بدأوا يوزعوا الأكل و الشرب ببلاش !! أيوه ببلاش ، لما حسوا بنبض الشباب و إحساسهم ، بقوا يروحوا يجيبوا الاكل و الشرب و يمشوا يلفوا ع الناس يوزعوا ببلاش ، حتى الناس اللى كان بيجيب حاجة كان بيوزعها و يقسمها مع اللى جنبه .

كانت اللقمة طعمها حلو أوى و احنا فى الموقف ده ، و ما كانش حد بيسأل اللى جنبه قبل ما يديله اللقمة انت مسلم ولا مسيحى ! ولا انت انتماءك تبع أى تيار . كانت ليلة حسينا فيها بكلمة " مصريين " بدون أى شرح !

ظهر مع الوقت مكروفون و سماعات و لقينا عبد الرحمن يوسف القرضاوى موجود و بيخطب فينا و يحمسنا و ينقل لنا أخبار اللى حولينا ، كمان جميلة اسماعيل اتكلمت ، و بعدها لقينا علاء الأسوانى ، و كنا فى قمة التحضر و أكدنا على عدم الاعتداء و منع أى واحد يخرب أو يتلف ممتلكاتنا كلنا .

خلال كل ده كان فيه مجموعات بتنضم لينا من كل مكان و تمرّ من كردون الأمن المركزى و توصل لنا فى قلب الميدان .

على الرغم من محافظتنا على الحركة سلمية ، إلا ان قرب نص الليل لقينا الأمن جاب تعزيزات كتير جدا و عربيات مدرعة كتير و ظهر رتب للأمن و معاهم بلطجية و قوات امن فى ملابس مدنية ، و بدأوا فى تحويطنا استعدادا للضرب .

و فعلا بدأ الضرب و اتضربت طلقات رصاص فى الهوا عشان إرهاب الناس ، و اتضربت قنابل مسيلة للدموع لا تعد ولا تحصى ، و هى دى اللى نجحت فى تفريقنا لأن كتير منا ما كانوش قادرين يتنفسوا ولا يشوفوا قصادهم ، أنا كنت حاسس كأن وشى كله مولّع ، مش بس عينى و مناخيرى ، و بعد ده كمان بدأوا يضربونا بالمايه فى عز السقعة اللى كنا فيها ، بدون أى رحمة و بدون مراعاة حتى للستات اللى واقفة ، لكن ده هو اللى كان متوقع من كلاب النظام ، مافيش أى رحمة ولا حتى تعاطف ، مافيش أى نخوة أو شهامة .

بعد ما اتفرقنا فى الشوارع الجانبية بدأوا يطارونا و كملوا ضرب القنابل المسيلة للدموع و كأننا اسرائيليين مش مصريين ، على الرغم إن مافيش واحد منهم عمره رفع عصاية على اسرائيلى ، دول بس معملوين عشان يضربونا بدم بارد .

حاولنا نروح ميدان رمسيس لكن الأمن منعنا و مقدرناش ، و انتهى الاعتصام ده و كل واحد حاسس بمرارة ما تتوصفش ، و اللى ما كانش جرب ظلم النظام و بطشه أو كان بيصدق كلام الجرايد القومية ، دلوقتى داق بنفسه ، و عرف إنه قصاد ديكتاتور و طاغية عمره ما اهتم بحاجة إلا كرسيه ! و عمر ما اهتم اللى حوليه إلا بالسلب و النهب و القتل !

مات امبارح أربعة فى السويس ، و طلع إعلام النظام يقول إن الناس هم اللى ضربوا الأمن !!! و إنهم قتلوا عسكرى كمان !! على الرغم من إن كل ده متصور أصلا و فيه ألف كاميرا رصدته و رصدت إزاى المصريين كانوا متحضرين بجد ، و إزاى الأمن هو اللى بهدلهم !

احنا مش حنسكت ، و الوقفة دى مش حتخلص أو تعدّى كده و كل حاجة ترجع لحالها ، الوقفة دى الشرارة اللى حتحرق الطاغية و أعوانه ! و الضرب و الإهانة اللى حصلت لنا امبارح مش حنعديها !

النظام بيحاول يضرب فى الناس بكل قوته ، حتى لو وصل الأمر إنه يقتلهم ، لكن يا خوفى فى اللحظة اللى تتحول فيها التظاهرات من سلمية إلى العنف اللى حيحرق كل اللى يقف قصاده مهما كان و مهما كان تسليحه !

مبارك مرعوب و اللى حوليه مرعوبين أكتر منه ، و كل واحد بيجهز شنطته عشان يعمل زى جمال ، صحيح الحزب الوثنى بينفى إنه سافر ، لكن الناس كلها بتأكد إنه سافر هو و مراته و شنط كتير من يومين ، ياللا فى ستين ألف داهية و عقبال الباقى !!

الفرصة دى من دهب و عمرها ما حتتكرر تاني ، شعب مصر لأول مرة بيتوحد بجد و بيعمل حاجة عمره ما عملها ، إنه يثور ضد الظالم و يغيره بإرادته و يعزله و دى لو حصلت حيبقى انتصار رهيب .

مش مبارك بس اللى مرعوب ، ده أمريكا مرعوبة و عاملة تعتيم ع الاخبار كلها و بتصرح امبارح إن حكومة مصر بخير !! ياااه قد كده انتو خايفين من التغيير و بتساندوا مبارك ؟ قد كده خايفين مصر ترجع لانتصاراتها تانى ؟! أمال فين الديمقراطية يا ولاد الكلب ؟

كمان أغلب القنوات الاخبارية عتمت على الدنيا و ما نشرتش إلا أخبار على استحياء و دى كانت حاجة غريبة جدا !!!!

أما الإعلام الرسمى سواءا الجرايد أو التليفزيون و الراديو فكالعادة طلعوا الموضوع على رأى الحكومة " زوبعة فى فنجان " و طلعوا الشعب همجى و لزقوا التهم فى الإخوان !!

حسبنا الله و نعم الوكيل ، يا رب انصرنا ع الظالم و المفترى ، و ارحم اللى ماتوا برحمتك و ثبتنا ضد الطاغوت لحد ما يغور !

و يا جماعة ، اللى خايف ، يتشجع و ينزل معانا ، ما تخافش المرة دى حنقدر نغير ، المرة دى احنا خلاص فقنا بجد و واقفين مع بعض ، و مش حنستريح الا لما الغمة دى تنزاح .

شيل أى أفكار سلبية اتزرعت جواك و ما تسيبش إخوانك و أصحابك يتضربوا و يتقتلوا و دمهم يروح هدر ! انصرهم و اقف معاهم ، وقوفك بس انتصار ، لو عددنا أصبح أكتر من قوات الأمن ، خلاص ، حتتنهى اللعبة !

بالله عليك ، يا كل واحد بيتفرج علينا ، هات اصحابك و انضموا لينا ، احنا مش بنطالب بحقوق لينا و انت لأ ، احنا بنطالب بحقنا كلنا بكل طوائفنا ، و ممكن نموت و احنا كده ! لسه حتقف تتفرج علينا ؟!

من عرف شرف ما يطلب ، هان عليه ما يبذل .